ايوا احببتها بقلم فاطيما يوسف

بسم الله الرحمن الرحيم
لا اله الا الله وحده لا شريك له يحيى له الملك وله الحمد وهو على كل شيء قدير
نازل كريم من الطيارة بشياكته وأناقته المعتاده ولابس نظارته الشمسيه واللي يشوفه يقول عليه شاب في العشرينات مش عنده 40 سنه خالص وكان مستنيه السواق بتاعه واول ما وصل بص له عم سيد السواق وقال له بوجه بشوش 
حمد لله على السلامه يا كريم يا ابني نورت مصر والدنيا بحالها بقالك تمن سنين غايب عننا وبجد كنت واحشني قوي قوي
ايوه احببتها بقلم فاطيما يوسف
وكمل سيد كلامه وهو بيطبطب على ظهره 
عملت ايه يا ابني ان شاء الله تكون اتوفقت في شغلك طول السنين دي 
والله ولا مره غبت عن بالي وكل لما كنت بكلمك فيديو كنت بحس ان انت واحشني اكتر حمد لله على السلامه يا حبيبي .
حضنه كريم باشتياق لانه بيحبه جدا وبيعتبروا زي والده الله يرحمه لان هو اللي رباه وكان معاه في كل مكان بيروحوا وكان واخد باله منه علي الاخر وكمان والده كان موصيه على عم سيد جدا وقال له 
وانت كمان وحشتني قوي يا راجل يا طيب عامل ايه وبنتك الصغنونه اخبارها ايه 
رد عليه عم سيد بابتسامه وقال له 
نحمد الله يا ابني على كل حال انا في نعمه وفضل من الله وزهره كمان بقت عروسه دلوقتي ما شاء الله عليها خلصت الثانويه ودخلت تمريض عسكري 
والبركه في والدتك بعد ربنا هي اللي وقفت جنبنا وشافت لنا واسطه ودخلتها
وهي في سنه تانيه دلوقتي فاضل لها لسه تلت سنين كمان .
فرح جدا كريم علشان زهره دخلت التمريض العسكري اللي كانت نفسها تدخلوا من زمان ما شافهاش كانت لسه في الابتدائيه لما كان مسافر وكان دايما بيشاغبها لانها كانت طفله محبوبه جدا وقال له بفرحه 
ربنا يخليها لك ويحفظها لك يا عم سيد هي كانت بتتمنى انها تدخل تمريض عسكري من زمان كان نفسها تبقى حضره الرائد زهره وفعلا طلعت شطوره وحققت حلمها لما اوصل ان شاء الله باذن الله واستريح كده هبقى اجي لكم زياره وتخلي الحاجه ام زهره تعمل لي الملوخيه اللي انا بعشقها من ايديها .
رد عليه ابو زهره وقال له بامتنان 
ده انت تؤمر من العين دي قبل العين دي يا حبيبي 
استريح براحتك وخد نفسك وهتلاقيني جاي اخدك بالعربيه واعمل لك احلى ملوخيه على بط .
وركبوا الاتنين العربيه وطول الطريق عمالين يتكلموا مع بعض ده عمل ايه في حياته وده عمل ايه في سفره كانهم اب وابنه وحشين بعض مش حضره البيه والسواق اللي شغال عنده 
وصل كريم الفيلا وقابلته والدته بفرحه وابتسامه اي نعم هي كانت بتسافر له كل سنه بس برده اخيرا رجع ويستقر هنا 
وقالت له بفرحه وهي بتبوسه من كل حته 
حمد لله على السلامه يا روحي نورت بيتك وحياتي واظن بقى ما فيش سفر تاني كفايه غربه بقى وانسى اللي فات وعيش حياتك يا حبيبي مراتك الله يرحمها ماټت من زمان وانت سنك دلوقتي تسعة وتلاتين وداخل على الاربعين نفسي افرح بيك واشيل عيالك بايدي يا نور عيني 
باسها كريم من راسها واتنهد بحزن لما فكرته بمراته اللي ماټت بعد اول سنه جواز 
ولسه لحد دلوقتي لابس دبلتها في ايديه ما خلعهاش وقال لها وهو متاثر 
ليه يا امي تفكريني وانا بحاول انسى بالعافيه قلوبنا مش بايدينا نغيرها زي ما احنا ما عايزين كل ده باراده ربنا سبحانه وتعالى وانا مش
قادر
انساها