حب جديد
مش حاسة من ناحيتك ب إهتمام
ليه بتوصلني ل كده بجد
مانت مش هتصدقيني بس بجد أنا مش بركز للدرجة دي يعني أنا في الشغل دماغي كلها في الشغل حاطط ف إعتباري إني هرجع و أنت هتبقي كويسة و لو مش كويسة هاخدك أكشف لك و بس مجاش في دماغي كل ده
ده طول حياتك كده
يعني المفروض مين يفكرك إنك تهتم بمراتك
أنت
قوليلي ماتنساش تكلمني يا إبراهيم هتلاقيني بكلمك أكلني معاك يا إبراهيم هتلاقيني بأكلك ب إيدي فسحني يا إبراهيم هتلاقيني بفسحك
إزاي يعني اللي بتقوله ده هو أنا هعلمك تهتم بيا إزاي
ايوه علميني عادي و أنا هنفذ تزعلي مني لو لفتي نظري و لقتيني طنشت لكن شوفتي لما قولتيلي إنك تعبانة و عايزة تكشفي و مضايقة إني ماسألتش و إنك جعانة و ماكلتيش أنا نزلت و جبت الدكتور و جبت لك أكل تاني تزعلي مني لو كنت سيبتك زعلانة و نزلت و طنشتك
مانت مطنشني بجد على فكرة
وحياتك لا اعملي بس زي ما بقولك و صدقيني مش هتحسي ب اللي بتقوليه ده
الناس كلها تقول الاهتمام مابيطلبش و أنت عايزني أعيش عمري معاك أطلبه
مابتطلبيهوش من حد غريب و بعدين تزعلي لو طلبتي و مالقتيش رد
طريقتك غريبة و مش عجباني و مش مقتنعة
جربيها شوية لو مانبسطيش بطليها
أبطلها و تهتم بيا من نفسك لوحدك
جربيها بس الأول لو مانبسطيش و حستيها أحسن بطليها براحتك
كلامه غريب أول مره اسمعه في حياتي في واحد يقول كده لمراته
بس عملت ب كلامه بقيت أشوف أنا عايزة ايه و أقوله عليه طريقة غبية مۏت ماكنتش متحملاها في الأول يعني ايه أطلب ب نفسي كده من غير مايتعملي اللي أنا عايزاه
بقيت أحط الأكل قدامه و الطبيعي إني هقعد هاكل معاه بس قبل ما أقعد أقوله
إبراهيم نادي عليا أكل معاك
يرد عليا في نفس اللحظة و كأنه بينادي و أنا أعمل نفسي مش واخده بالي
حورية تعالي كلي معايا الأكل مش هيحلى غير بيك
بعد ما أخلص أي حاجة عملتها أقوله
إبراهيم أنا تعبت تسلم إيدي
تسلم ايدك يا حبيبتي ربنا مايحرمني منك تعبتي حقيقي كتر خيرك
إبراهيم حورية تعبت و زهقت النهارده عايزة حاجة تفتح نفسها على الحياة
حورية حبيبتي أكتر واحده بتتعب معايا هقوم أجيب لها حاجة حلوة تحبي ايه
و هكذا بقيت الحياة اليومية مابينا كأنها لعبة أقوله أنا عايزة ايه بطريقة غير مباشرة ف يفهم و ينفذه على طول
كنت ناوية أعانده و أقوله إنها
طريقة مستفزة مش هنفذها بس طالما هو بيعملي اللي أنا عايزاه و بكل حب و مش بيشتكي مني أشتكي أنا ليه
عشان الطريقة مختلفة
مش مهم الطريقة المهم النتيجة
تعالى أخرجك النهارده
ايه ده من غير ما أطلب كده
ما أنا خلاص حفظت النظام
مش مصدقة إن الطريقة بتاعتك جابت نتيجة و بقيت
تهتم بيا من غير ما أطلب
خلاص حفظت اللي يبسطك و بقيت أخد بالي من كتر مالفتي نظري ف بقيت مانساش طول الوقت بقيت أخد بالي إن في حورية و في حق حورية و لازم أعمل حساب نصيب حورية
ياختي على الاهتمام و الحب ياناس
كله عشان ننول الرضا
