منعطف خطړ ٤٧بقلمي ملك إبراهيم

صغير بينده بأعلى صوته
حسن أبو عليييي!
خالد لف بسرعة
وشاف أحمد بيجري عليه بكل حماس
فتح دراعاته
وأحمد دخل جوه حضنه.
أحمد اتكلم وهو بيضحك من قلبه
انت وحشتني أوووي.. أنا كمان وحشتك
خالد بص له بعين فيها شوق وقال
طبعا يا بطل.. حمدلله على السلامة.
قرب منهم راشد وهو مبتسم
ومعاه مراته سهام وبنته مايا اللي ماكنتش شايلة عينيها من على خالد.
راشد سأل باستغراب
أومال فين ياسمين
خالد مسك إيد أحمد بحنان وقال
لسه متعرفش.. كنت عايز أعملها مفاجأة.
وبص لمرات راشد وبنته وقال بأدب
حمدلله على السلامة.. نورتوا مصر.
مايا كانت واقفة تلعب في شعرها وعنيها متثبته علي خالد
وسهام والدتها لمحت ده بسرعة
خبطتها في دراعها وهمست لها بعصبية
متجوز بنت عمك يا هانم.. حبيت أفكرك بس!
مايا ردت بدلع وهي بتبص على خالد
وبنت عمي دي حلوة علي كده وتستاهل القمر ده.
سهام قالت بحدة
حلوة ولا مش حلوة ده مايخصكيش..
ابعدي عنهم احنا مش ناقصين مشاكل
كفاية علينا أخوكي!
راشد قرب من خالد وهم بيتكلموا على جنب بعيد عن سمع أحمد
بص يا خالد.. أنا عارف إن ياسمين نفسها أخوها يعيش معاها
بس جده هو الواصي عليه
ومش هيوافق إنه يعيش معاكم دلوقتي
بس هحاول أقنعه إن من مصلحة الولد يكون جنب أخته.
خالد اتنهد وقال بهدوء
فاهم حضرتك.. 
وياسمين بس لما تشوفه بعنيها وتتطمن عليه
أكيد هتقبل إنه يعيش مع جده لحد ما نشوف حل.
راشد وخالد اتفقوا على كل حاجة. 
وراشد وافق إن أحمد يروح مع خالد ساعتين يشوف ياسمين
وبعدها يرجعه تاني يروح معاهم بيت الشرقاوي.
خالد أخد أحمد في إيده وخرجوا من المطار
ووشه كله شوق للحظة اللي هيدخل فيها على ياسمين وهي تلاقي أخوها قدامها.
راشد رجع لمراته وبنته وقال
تعالوا نقعد في أي كافيه قريب نتغدى لحد ما خالد يرجع احمد. 
رواية منعطف خطړ بقلمي ملك إبراهيم. 
في المصنع. 
مكتب سالم الدريني 
ياسمين خبطت على الباب
وصوت سالم جه من جوه
ادخل.
أول لما فتحت الباب لمحت شاب قاعد قدام سالم
اتكلمت بهدوء وهي واقفة
أجي لحضرتك وقت تاني
سالم ابتسم وقال بحماس
لأ طبعا تعالي يا ياسمين..
وشاور على الشاب وقال
ده الباشمهندس هشام.. المهندس الجديد اللي انضم لينا.
ياسمين دخلت قربت بخطوات هادية
وبصت ل هشام وقالت بأدب
أهلا بحضرتك.
هشام وقف بابتسامة ترحيب وقال
أهلا بيكي يا أستاذة ياسمين.
سالم كمل التعارف وهو مبتسم بفخر
ياسمين دي بنتي.
وكان يقصد بنتي بمعناها القريب لقلبه.. مش مجرد مرات ابنه
قعدوا التلاتة وسالم قال بحماس
أنا كنت بحكي للبشمهندس على خطتك في تشغيل المصنع
وعجبته الفكرة جدا
وهيشتغل معاكي الفترة الجاية على تنفيذها
ويجهز المكن للنظام الجديد.
ياسمين ابتسمت وهزت راسها بثقة وقالت
إن شاء الله نوصل لأعلى معدل إنتاج في تاريخ المصنع.
هشام بص لها وقال بنفس الثقة
إن شاء الله.
فجأة دخل رئيس العمال بسرعة وقال
حاج سالم.. المخازن رافضين يسلموا شغل جديد.. ممكن تنزل معايا